અમારા વિષે

આજે આ વાડી સમાજની ગૌરવપૂર્ણ ઓળખ બની છે. અહીં આધુનિક ઓફિસ, એ.સી. હોલ, વિશાળ સભાખંડ, ક્લાર્ક રૂમ, ચોકીદારની વ્યવસ્થા, પાણીની સુવિધા, વોશરૂમ તથા અન્ય જરૂરી સગવડો ઉપલબ્ધ છે. આસપાસ અન્ય કોઈ મોટી સમાજ વાડી ન હોવાથી અન્ય સમાજો પણ આ વાડીનો લાભ લે છે, જેના કારણે સમાજને આવક પણ પ્રાપ્ત થાય છે.

આજે કચ્છનો રાજપુત સમાજ સંગઠન, શિક્ષણ, સામાજિક સેવા અને વિકાસના ક્ષેત્રે અગ્રણી સ્થાન ધરાવે છે. વાણિયા અને લોહાણા સમાજ પછી કચ્છના અગ્રણીઓમાં રાજપુત સમાજનું મહત્વપૂર્ણ સ્થાન ગણાય છે. સમાજના પૂર્વજોના ત્યાગ, પરિશ્રમ અને દૂરંદેશીના કારણે આજે સમાજ પ્રગતિના નવા શિખરો સર કરી રહ્યો છે.

સમાજને અપીલ

આપણો સમાજ વિશાળ અને પ્રગતિશીલ છે. આવા મોટા સમાજનું સંચાલન અને વિકાસકાર્યો સરળ નથી. સમાજના કારોબારી સભ્યો પોતાના કિંમતી સમય, શ્રમ અને ઘણી વખત પોતાના ખર્ચે સમાજના હિત માટે સતત કાર્યરત રહે છે. તેથી તેમના કાર્યનું સન્માન કરવું એ દરેક સમાજજનની નૈતિક જવાબદારી છે.

સમાજના કાર્યમાં ખામીઓ શોધવા કે કાર્યકર્તાઓ પર આંગળી ચીંધવા કરતાં સમાજને વધુ મજબૂત બનાવવા માટે સહયોગ આપવો જોઈએ. જો કોઈ સૂચન કે ફરિયાદ હોય તો તેની જાહેર ટીકા કરવાને બદલે રૂબરૂ ચર્ચા કરીને રચનાત્મક માર્ગદર્શન આપવું જોઈએ. પોતાના અનુભવ, જ્ઞાન અને કુશળતાનો લાભ સમાજને આપવો, કાર્યકર્તાઓનું સન્માન કરવું અને તેમના સારા કાર્યની પ્રશંસા કરવી જોઈએ, જેથી તેઓ વધુ ઉત્સાહ અને સમર્પણથી સેવા આપી શકે.

સમાજના વિકાસ માટે સારા વિચારો ધરાવતા કાર્યકર્તાઓ અને આર્થિક સહયોગ – બંનેની જરૂરિયાત છે. સમાજની તમામ કામગીરી બંધારણ અનુસાર પારદર્શક રીતે કરવામાં આવે છે. સમાજના વાર્ષિક હિસાબ, ખર્ચ અને બચતની માહિતી દરેક સભ્ય જાણી શકે છે. ફુરસદના સમયમાં જે સભ્યો હજુ સુધી સભ્યફી ભરતા નથી તેમને પ્રેરિત કરવા, નવા દાતાશ્રીઓ જોડવા તથા સમાજના વિકાસ માટે નવી યોજનાઓ અને સૂચનો પ્રમુખશ્રી તથા કારોબારી સમિતિ સુધી પહોંચાડવા દરેક સમાજજન આગળ આવે.

ભૂલ દરેક વ્યક્તિથી થઈ શકે છે. તેથી ભૂલચૂકને ક્ષમાભાવથી સ્વીકારી સમાજહિતને સર્વોપરી રાખીને સૌએ સાથે મળીને કાર્ય કરવું જોઈએ. "સંપ ત્યાં જંપ" અને "એકતામાં જ શક્તિ છે" – આ સૂત્રને જીવનમાં ઉતારી આપણે સૌ એકતાથી આગળ વધીએ તો સમાજનો સર્વાંગી વિકાસ થશે અને આજના યુગમાં આપણો સમાજ વધુ સશક્ત, સંગઠિત અને ગૌરવશાળી સ્થાન પ્રાપ્ત કરશે.

આપણા સમાજની ધાર્મિક પરંપરા અને સામાજિક એકતા

આપણો સમાજ વિશાળ અને ગૌરવશાળી છે, છતાં સમાજના ઘણા પરિવારોને પોતાના કુળદેવી-દેવતા, ગોત્ર, વંશ, ધાર્મિક પરંપરા અને પૂજાવિધિ અંગે પૂરતી માહિતી ઉપલબ્ધ નથી. આપણા વડીલો શિક્ષિત ન હોવાથી ઘણી માહિતી મૌખિક પરંપરાથી જ આગળ વધી છે, જેના કારણે સમય જતાં કેટલીક વિગતો અસ્પષ્ટ બની ગઈ છે. તેથી દરેક સમાજબંધુએ પોતાના કુળદેવી-દેવતા, ઇષ્ટદેવ, ગોત્ર, વંશ તથા ધાર્મિક પરંપરાની સાચી માહિતી મેળવવી જોઈએ અને શ્રદ્ધા, ભક્તિ તથા શુદ્ધ ભાવથી પૂજા-અર્ચના કરવી જોઈએ. દર્શન સમયે ફૂલ, ફળ, શ્રીફળ, પ્રસાદ, ધૂપ, દીવો, અગરબત્તી, કંકુ, ચુંદડી (વાઘા) વગેરે સાથે લઈ જઈ ભગવાન અને માતાજીના આશીર્વાદ મેળવવા જોઈએ. અંધશ્રદ્ધાથી દૂર રહી ભાવપૂર્વક કરવામાં આવેલી ભક્તિ જ જીવનમાં સુખ, શાંતિ અને મનોકામના પૂર્ણ કરવામાં સહાયક બને છે.

સોશિયલ ગ્રુપ (સમાજ સેવા)

સમાજના સેવાભાવી અશોકભાઈ મેર તથા અન્ય કાર્યકરો દ્વારા વિવિધ સામાજિક સેવાકીય પ્રવૃત્તિઓ કરવામાં આવે છે. આ ગ્રુપ દ્વારા નિઃશુલ્ક એમ્બ્યુલન્સ સેવા, મફત ઝેરોક્સ, વિદ્યાર્થીઓને નોટબુકનું વિતરણ, જરૂરિયાતમંદ દર્દીઓ તથા વિદ્યાર્થીઓની ફી માટે ભંડોળ એકત્રિત કરી આર્થિક સહાય, વડીલો માટે ધાર્મિક પ્રવાસનું આયોજન તેમજ જરૂરિયાતમંદ પરિવારોને દર મહિને રાશન કીટનું વિતરણ જેવી સેવાઓ પૂરી પાડવામાં આવે છે. આ સેવાકીય કાર્યમાં શ્રી રાજુભાઈ પરમાર અને શ્રી ઘનશ્યામસિંહ રાઠોડ સહિતના સમાજસેવકોનું પણ નોંધપાત્ર યોગદાન છે. આ ગ્રુપનું કાર્યસ્થળ પડદાભીઠ મંદિર રોડ, હંગામી એસ.ટી. વર્કશોપ પાસે, ભુજ ખાતે આવેલ છે.

અખિલ કચ્છ રાજપુત સંઘ

અખિલ કચ્છ રાજપુત સંઘના પ્રમુખ શ્રી નીતિનભાઈ મકવાણાના નેતૃત્વ હેઠળ સમગ્ર કચ્છ જિલ્લાના રાજપુત સમાજમાં એકતા, સંકલન અને સંગઠનને મજબૂત બનાવવા માટે સતત પ્રયાસો કરવામાં આવે છે. સંઘ દ્વારા અંજાર, માંડવી, મુન્દ્રા, ભચાઉ, નલિયા સહિત વિવિધ તાલુકાઓના સમાજના આગેવાનો અને પ્રમુખો સાથે નિયમિત સંપર્ક અને બેઠક યોજી પરસ્પર સહકાર, સમાજના વિકાસ અને એકતા માટે કાર્ય કરવામાં આવે છે.